ТРИбина раскажува нови приказни. Умешноста на раскажувањето е една од најмоќните алатки за комуникација не само на новото време, туку уште од почетоците на човековото постоење.
Без приказни и раскажување, немаме минато, ниту иднина. Тоа најдобро го знае врвниот македонски раскажувач и професор Венко Андоновски. Неговите книги се неисцрпен извор на мудрости и филозофија, а неговите кажани мисли, предавања и совети се бесценето богатство.
Како втор настан во низата случувања под логото на ТРИбина, на 16 април ве покануваме во Јавна соба, од 18 ч., на незаборавен настан со Венко Андоновски. Темата е „Уметноста на создавањето приказни – и како да станеме вешти раскажувачи“.
Раскажувањето ни е дел од секојдневието. Во животот без маски и титули, како и во професионалниот живот во кој секогаш треба да бидеме стопроцентно посветени и каде што секој збор е значаен.
На ова предавање, преку професорот Венко се сосредоточуваме особено на:

• Раскажувањето како техника што може да се користи за лични и деловни цели;
• Раскажувањето како практика за јасна, прецизна и несекојдневна мисла во секој вид комуникација, во некнижевна и во книжевна форма;
• Раскажувањето како професионална алатка во различни деловни сфери.
  А писателот Венко ќе ви одговори уште и на прашањата:
• Зошто им читаме приказни на децата пред спиење, или – имаат ли приказните хипнотичко и седативно дејство?
• Зошто кога ќе се зачитаме доцниме секаде, или – може ли приказната да го сопре времето и стрелките на часовникот?
• Зошто по секоја приказна посакуваме да победиме, или – дали приказните можат да ни го сменат животот?
• Зошто по приказните сме похрабри да им пријдеме на оние кои ни се допаѓаат, а пред приказните се срамиме?
  И друго, и друго…
  По предавањето ќе следува дискусија во која ќе можете да ги поставите своите прашања што не сте имале можност или смелост да ги кажете досега. Некои од нив сигурно ќе произлезат од инспиративното предавање, кое ќе биде, всушност, практичен пример за тоа дека раскажувањето е клучно за сите видови односи.
  Ве очекуваме на настан што ги обединува уметноста и умешноста, приказните и животот, раскажувањето и живеењето.